Вардар по голема борба минимално поразен од Нант

Црвено-црните имаа два гола предност во последните десет минути, но францускиот тим со погодок од седмерец во завршницата стигна до победа од 33-32.

Вардар го одигра првиот домашен натпревар во новата сезона од Лигата на шампионите. Пред исполнетите трибини во СЦ „Јане Сандански“, нашиот тим беше рамноправен со Нант до последната секунда, но гостите заминаа со минимална победа од 33-32 (16-15).

Вардар одлично го отвори натпреварот. Јака Малус го постигна првиот гол, Вукашин Воркапиќ двапати беше прецизен, а Васил Гогов забележа две одбрани за почетно водство од 3-0.

Нант постепено се врати и во осмата минута израмни на 5-5. Црвено-црните повторно ја презедоа предноста, а по погодокот на Леон Љевар во 11. минута водеа со 8-7.

Периодот со неколку неискористени напади гостите го казнија со серија од 5-0 и поведоа со 12-8. Вардар не дозволи противникот да се одлепи. Абделхак Мохаб намали на 12-11, а Милош Валах со неколку интервенции му помогна на тимот повторно да се приближи.

На паузата Нант замина со минимално водство од 16-15, откако Матео Фадуил погоди на празен гол во самиот финиш на првото полувреме.

Валах го отвори вториот дел со одбранет седмерец, а Вардар веднаш израмни на 16-16. Следуваше изедначена игра, во која двете екипи постојано се менуваа во водство. Црвено-црните останаа конкурентни и во периодите кога играа со ракометар помалку, а Јака Малус двапати погодуваше за израмнување.

Во последните десет минути Вардар влезе со резултат 27-27. Мохаб пресече една топка и погоди на празен гол за водство од 28-27, а Воркапиќ на ист начин зголеми на 29-27 во 52. минута.

Нант успеа да се врати, но Вардар повторно поведе со 30-29 и имаше можност да стигне до два гола предност. Следуваше ново израмнување, а во 57. минута резултатот беше 31-31.

Во драматичната завршница секој напад и секоја топка беа важни. На 15 секунди до крајот Нант доби седмерец, кој Ноам Леополд го реализираше за водство од 33-32. Вардар имаше можност за израмнување, но последниот удар заврши со одбрана на гостинскиот голман.

Абделхак Мохаб со десет погодоци беше најефикасен во редовите на Вардар, додека Јака Малус постигна шест. Кај Нант се истакна Ноам Леополд со 13 гола.

СТАТИСТИКА Вардар – Нант Vardar – Nant