Иван Чупиќ е новиот тренер на Вардар

Поранешниот играч на Вардар кој двапати со клубот ја освои европската титула, Иван Чупиќ во следните две сезони ќе биде тренер на „црвено-црните“. Тој деенска беше промовиран како нов шеф на стручниот штаб, и доаѓа на местото аргентинскиот стратег Гиљермо Милано, кој се задржа во клубот помалку од една сезона.

Шупич во периодот од 2016 до 2021 беше дел од клубот. По завршувањето на играчката кариера, Чупиќ беше дел од стручниот штаб во Загреб како асистент, а минатата сезона го водеше Метковиќ и му обезбеди опстанок.

„Благодарност до клубот Метковиќ, кој ми даде шанса минатата сезона да собирам искуство тренерско, но кога дојде повик од Вардар, тоа е мојот друг дом, не можев да одбијам ниту да размислувам. На клубот, на претседателот сум благодарен на оваа шанса, многу сум горд. Знаете што за мене значи Вардар, Скопје, Македонија, Комити, нема да се повторувам за таа приказна. Можам да ветам дека целата моја екипа следната сезона мора да има голема одговрност и дека мора да бидеме почестени што сме дел од ваков голем клуб како Вардар. Со мојот стручен штаб сакам да им го пренесам на играчите што значи да се биде дел од Вардар. Тоа ќе го почнеме уште од првиот ден, Вардар е поголем клуб од сите нас. Со голем ентузијазам и голема желба сакам да ги оствариме сите цели што стојат пред нас и ветувам дека сите ќе го ставиме Вардар пред себе и ќе работиме да ја вратиме титулата по три сезони. Горд сум што ќе работам во ваква лига, за мене притисокот е добра работа“, изјави Чупиќ.

Осврт на прес-конференцијата имаше и претседателот на клубот, Михајло Михајловски.

„Вардар минатата година го освои само Купот. За жал во Лигата на Европа за влакно не се пласиравме во следниот круг, иако сум горд што го победивме Мелсунген кој потоа играше во завршницата на овој куп. Многу сум разочаран од оној последен натпревар во Скопје, по натпреварот со Пелистер не сакав да зборувам за ракомет.

Го победивме Еурофарм Пелистер во Охрид во Купот, го победивме Пелистер и на гостински терен во Битола и кога беше најпотребно тука во Скопје не знам зошто го изгубивме натпреварот иако имавме активен резултат до 56 минута. За мене најголем виновник беше стручниот штаб, пред се тренерот, а потоа играчите. Подготвуваме екипа за Европа и како ретко кога Вардар го затвори ростерот уште во април, целта е да се освои прво место во Македонија, да се освои Купот на Македонија, а во Лига Европа која е се појака и појака целта ќе биде пласман меѓу 8 најдобри.

Сите го паметите Чупиќ како легенда на Вардар двапати со него освоивме Лига шампионите, а особено го паметиме победничкиот гол против ПСЖ. Имавме доста комбинации за тренери, но се одлучивме за Чупиќ бидејќи уште како играч искажуваше некакви тренерски амбиции. Кога се разидовме со Чупиќ од Вардар не беше спорно да остане или бидејќи причините не беа само финансиски, туку тој ми побара после играчка кариера да биде тренер на Вардар. За да биде некој тренер на Вардар сметам дека му треба пракса на секој играч од барем една година како тренер за да може да го прифати предизвикот и затоа не го прифатив тогаш. Затоа сега кога се јавив и му кажав Чупиќ дали сакаш да дојдеш како тренер, ми кажа доаѓам веднаш и така се договоривме. Иван Чупиќ ќе биде прв тренер, Келентриќ кој во меѓувреме го договоривме и тој ќе биде тренер на голманите, додека Чупиќ ќе ги бира кондициски тренер и асистентите во стручниот штаб.
Стојанче Стоилов е икона на Вардар и за него секогаш има место во Вардар, сметам дека во моментов не е во позиција да го води Вардар, а на која позиција ќе биде во Вардар во иднина ќе видиме и ќе се договориме понатаму. За него секогаш вратата е отворена, изјави Михајловски.

Со новиот тренер Иван Чупиќ договор е постигнат пред два дена и затоа сите детали околу новиот стручен штаб и како ќе изгледаат измените во составот на Вардар ќе се познати пред почетокот на новата сезона, во која претседателот на Вардар очекува освојување на два трофеи во македонското првенство и пласман меѓу ТОП 8 екипи во Европа.