Победата ни избега во последните секунди: Вардар и Мелсунген одиграа 26-26

Вардар го заврши настапот во групната фаза на Лигата на шампионите со реми против Мелсунген, 26-26 (14-12). Во неизвесен натпревар во „Јане Сандански“, нашите ракометари поведоа на 21 секунда до крајот, но гостите израмнија во последниот напад.

Мелсунген подобро го отвори дуелот и поведе со 3-0, а во 14. минута имаше предност од 10-7. Вардар постепено го пронајде својот ритам, ја зацврсти одбраната и израмни на 10-10. Матео Фадуил го донесе првото водство за нашиот тим, 12-11, а со уште два гола во завршницата на полувремето помогна на пауза да заминеме со 14-12.

Гостите подобро го започнаа вториот дел. Од 15-13 направија серија од три гола и поведоа со 16-15, а подоцна стигнаа и до 19-17. Вардар не дозволи разликата да порасне: Вукашин Воркапиќ погоди двапати по ред за 19-19, по што Фадуил со два последователни гола го врати водството на наша страна, 21-20.

Во последните десетина минути се играше гол за гол. Милан Лазаревски и Јака Малус ни носеа предност, но Мелсунген секојпат израмнуваше. По водството на гостите од 24-23, Малус погоди за 24-24, а Жоао Педро да Силва го врати Вардар напред со 25-24. Штел повторно израмни и натпреварот влезе во последната минута без победник.

И покрај исклучувањето на Марио Стојановски, Вардар доби можност да поведе. Фадуил беше сигурен од седум метри за 26-25 на 21 секунда до крајот. Мелсунген го искористи последниот напад и преку Флоријан Дростен стигна до 26-26 на седум секунди пред сирената.

Фадуил беше наш најефикасен ракометар со седум гола, Воркапиќ постигна четири, а Жоао Педро да Силва, Виктор Јанковски и Урош Митровиќ по три. Милош Валах запиша 14 одбрани и беше една од главните причини што Вардар до самиот крај беше во борба за победата.

Со ремито, Вардар ја заврши групната фаза со три бода, по победата во Нант и вечерашниот бод против Мелсунген. Ви благодариме за поддршката во „Јане Сандански“ и во текот на целата европска есен!

Се гледаме во Лига Европа!