Голем триумф во Франција: Вардар го совлада Нант со 33-27

Вардар ја забележа првата победа сезонава во ЕХФ Лигата на шампионите, и тоа на едно од најтешките гостувања. Црвено-црните во петтото коло го совладаа Нант со 33-27 (16-13), покажувајќи карактер, борбеност и зрелост во текот на сите 60 минути.

Домаќинот го отвори натпреварот со водство од 2-0, но Вардар брзо се стабилизира и во осмата минута, преку Урош Митровиќ, првпат поведе со 5-4. Цврстата одбрана и сигурната реализација донесоа предност од 8-5, а во 14. минута и водство од 11-7.

Нант успеа да се врати и да намали на 11-12, но следуваше нов силен период на Вардар. Со головите на Милан Лазаревски, Жоао Педро, Јака Малус и останатите расположени ракометари, црвено-црните повторно се одлепија на четири гола разлика. На паузата Вардар замина со предност од 16-13.

Францускиот тим на почетокот на второто полувреме се доближи на 15-16, но Вардар не дозволи пресврт. Урош Митровиќ и Виктор Јанковски ја вратија сигурноста во нападот, а потоа следуваше период во кој одбраната целосно го запре Нант.

Предводен од одличниот Милош Валах на голот, Вардар поведе со 20-16, а на почетокот од 41. минута резултатот беше 24-17. Црвено-црните продолжија да ја контролираат играта, не дозволувајќи му на домаќинот да се врати во натпреварот.

Највисоката предност изнесуваше десет гола, 33-23, по што Нант само го ублажи поразот до конечни 27-33.

Вардар одигра исклучително ефикасно во нападот, постигнувајќи 33 гола од 46 удари. Милош Валах беше еден од клучните играчи со 17 одбрани, додека најефикасен беше Леон Љевар со седум погодоци. Јака Малус постигна шест, а Урош Митровиќ, кој се врати по паузата од четири натпревари, пет гола.

Победата добива дополнителна тежина бидејќи Вардар настапи без Мохаб Абделхак и Махамаду Кеита. И покрај скратената ротација, тимот покажа голема енергија и колективна игра и испрати силна порака со триумфот во Франција.

Следниот натпревар во Лигата на шампионите Вардар ќе го одигра на 28 октомври, кога во СЦ „Јане Сандански“ ќе го пречека Мелсунген. Средбата е закажана за 18,45 часот.

НАНТ – РК ВАРДАР 27-33 (13-16)
Вардар: Валах (17 одбрани), Гогов; Стојановски 1, Воркапиќ, Георгиевски 4, Митровиќ 5, Љевар 7, Лазаревски 1, Матијаба-Тузолана 2, Анастасовски, Жоао Педро 3, Малус 6, Јанковски 1, Фадуил 3.
Нант: Турченко 4, Периќ 4, Турна 3, Гарсиандија 3, Леополд 3, Бриет 2, Тарафета 2, Абди 2, Норлик 1, Антонсен 1, Овничек 1, Габер 1.