СУПЕРКУПОТ Е ЦРВЕНО ЦРН – ПЕТТИ ТРОФЕЈ ЗА ВАРДАР

Вардар ја отвори сезоната 2026/27 со трофеј, откако во драматичен натпревар во Гевгелија го совлада Охрид со 32-31 (17-15). Вукашин Воркапиќ беше прв стрелец со 12 гола и го постигна победничкиот погодок во последните секунди.

Вардар ја започна новата натпреварувачка сезона онака како што посакуваше – со пехар во рацете. Во неизвесен натпревар одигран во спортската сала „26 Април“, црвено-црните покажаа карактер во завршницата и стигнаа до петтиот трофеј во Суперкупот на Македонија.

Охрид подобро го отвори натпреварот и по шест минути поведе со 4-1. Вардар брзо ја стабилизираше играта, ја зацврсти одбраната и се врати до 4-4. Следуваше период во кој двете екипи постојано се менуваа во водство, без ниту една да успее да се одвои.

Црвено-црните првпат поведоа со 7-6 преку Јака Малус, но Охрид продолжи да одговара. Во 27. минута противникот имаше минимални 14-13, по што следуваше одлична завршница на Вардар.

Малус израмни, Воркапиќ донесе водство, а по погодоците на Леон Љевар и уште еден гол на расположениот Воркапиќ, Вардар замина на одмор со предност од 17-15.

Мохаб Абделхак го отвори вториот дел со погодок за највисоки 18-15. Охрид не се откажа и ја искористи серијата нереализирани напади на Вардар. Гостите најпрво израмнија, а потоа поведоа со 22-20 во 39. минута.

Вардар повторно се врати во натпреварот. Одбраната стана поцврста, а интервенциите на Милош Валах му помогнаа на тимот да стигне до ново израмнување – 22-22.

Следуваше период на игра гол за гол, во кој голманите на двете страни имаа важна улога. Охрид во 51. минута поведе со 27-25 и влезе со два гола предност во решавачкиот дел од натпреварот.

Одговорот на црвено-црните беше вистински шампионски. Воркапиќ погоди за 26-27, Малус израмни, Љевар донесе водство, а Воркапиќ од седум метри ја комплетираше серијата од 4-0 за пресврт и предност од 29-27.

На две минути до крајот, по погодокот на Матео Фадуил, Вардар водеше со 31-29. Охрид успеа да искористи две грешки и на триесетина секунди до крајот израмни на 31-31.

Одговорноста во последниот напад ја презеде Вукашин Воркапиќ. Десното крило беше сигурно од линијата за седум метри и на дваесетина секунди до крајот го постигна својот 12. гол за водство од 32-31.

Охрид доби можност за последен напад, но обидот на Тилен Стрмљан не заврши во мрежата. Сирената го означи почетокот на црвено-црното славје и освојувањето на првиот трофеј во новата сезона.

Воркапиќ со 12 погодоци беше најефикасен ракометар на натпреварот. Јака Малус постигна седум, додека Абделхак, Љевар, Фадуил и Виктор Јанковски завршија со по три гола. Урош Митровиќ еднаш се запиша меѓу стрелците.

Вардар реализираше седум од осумте удари од седум метри. Воркапиќ и Малус заедно постигнаа 19 од вкупно 32 гола на тимот.

Рекорден петти Суперкуп

Со победата во Гевгелија, Вардар по петти пат стана освојувач на Суперкупот на Македонија. Претходните четири трофеи беа освоени во 2017, 2018, 2019 и 2023 година.

Црвено-црните остануваат најуспешен клуб во ова натпреварување. Вардар има пет трофеи, Еурофарм Пелистер три, а Алкалоид еден. Од деветте досега одиграни изданија на Суперкупот, Вардар настапи на осум и победи на пет.

Со новиот пехар, бројката на освоени домашни трофеи на Вардар во првенството, Купот и Суперкупот се зголеми на 39 – 16 шампионски титули, 18 трофеи во Купот и пет во Суперкупот.

По освојувањето на двојната круна во претходната сезона, Вардар ја продолжи победничката серија и на почетокот од новото поглавје. Првиот официјален натпревар донесе голема борба, драматична завршница и уште еден пехар во црвено-црните витрини.

Победничкиот пехар по завршувањето на натпреварот го врачија претседателот на Ракометната федерација на Македонија, Александар Стефанов, и министерот за спорт, Борко Ристовски.

РК ВАРДАР – ОХРИД 32-31 (17-15)

РК Вардар: Воркапиќ 12, Малус 7, Абделхак 3, Љевар 3, Јанковски 3, Фадуил 3, Митровиќ 1.

Охрид: Лиапис 6, Ѓукиќ 6, Иванковиќ 4, Мате 4, Стрмљан 3, Кеита 3, Јошида 2, Зечевиќ 2, Ивановски 1.