Вардар подготвен за стартот на Европската лига – Сесвете гостува во „Јане Сандански“

Ракометарите на Вардар  се подготвуваат за нов европски предизвик и почеток на сезоната во Европската лига на ЕХФ. Првиот натпревар за „црвено-црните“ ќе се одигра во вторник (18:45 часот) во СЦ „Јане Сандански“, а противник ќе биде хрватскиот претставник Сесвете.

Во пресрет на дуелот, на официјалната прес-конференција се обрати тренерот на тимот, Иван Чупиќ, кој нагласи дека Вардар секогаш оди со највисоки цели – без разлика во кое натпреварување настапува.

„Вардар секогаш има победнички аспирации, без разлика каде игра. Ова е клуб со голема историја и знаеме дека мора да испорачаме резултат. Тоа се и нашите амбиции – да одиме далеку во Европската лига. Подготвени сме да одиме чекор по чекор, со максимална концентрација на секој меч. Знаеме дека групата не е лесна, но секој бод е важен, изјави Чупиќ.

Тој додаде дека Вардар се подготвува за екипа која е во подем и има силна желба за докажување.

„Сесвете е млада и квалитетна екипа од Загреб која со Нексе и ППД Загреб доминира во Хрватска. Тие имаат енергија и мотив, но ние играме дома и ќе направиме сè за да ги освоиме првите бодови. Македонската лига, според мене, моментално е многу посилна и поизедначена од хрватската. Кај нас секој меч е тежок и тоа ни помага да бидеме подобро подготвени за Европа,“ нагласи стратегот на „црвено-црните“.

Чупиќ истакна дека атмосферата во тимот е одлична и дека победничката серија во Суперлигата дала дополнителна самодоверба.

„Досега во првенството имаме само победи. Екипата полека го добива обликот што го посакуваме. Оваа сезона е процес, но гледаме напредок. Главниот фокус секогаш ќе биде Суперлигата, но Европската лига ни е огромен мотив. Новите играчи мора да сфатат колку тежи вардаровиот дрес – тоа е посебна обврска и чест. Верувам дека сме на добар пат и дека ќе растеме од натпревар во натпревар,“ рече Чупиќ.

Капитенот Гоце Георгиевски поскаува полна сала

Стартува европската лига, домашен терен, со непозната екипа, фаворити сме на мечот. Трениравме добро,спремни сме за ривалот. Ги повикувам сите навивачи да не поддржат и со победа да го отвориме ова натпреварување. Имаме големи амбиции во оваа натпреварвање. Се надевам на победа, и заедно да ги оствариме целите што нис епоставени, вели капитенот Георгиевски

📍 Натпреварот Вардар  – Сесвете се игра во вторник (18:45 часот) во СЦ „Јане Сандански“ – Скопје.
Освен овие два тима, во групата Ф се натпреваруваат и Тулуз и Кристианштад.

Билетите се во продажба преку www.ticketx.com.mk – https://ticketx.com.mk/events/vardar-sesvete

🟥⬛ Поддржете го Вардар на стартот од новата европска сезона!
Ве очекуваме во „Јане Сандански“!