Вардар го доби дербито со Алкалоид

Вардар триумфатно го почна плејофот, и разигрувањето за тутулата откако со 34-26 (15-13) го победи Алкалоид. Сега нашиот тим има четири бода на табелата.

Ги имавме вечерва расположениот Мигуел Еспиња и Вуко Борозан. Голманот Еспиња нанижа вкупно 15 одбрани, од што седум во првото полувреме, и неколку„двојни“ одбрани во второто полувреме. Во нападот Борозан беше незадржлив и непредвидлив, особено во првото полувреме кога постигна седум од вкупно осумте гола на средбата.

Го отворивме натпреварот со серија од 3-0, навестувајќи дека сме расположени за надигрување и уште повеќе за давање голови. Но ривалот успеа да се задржи н анозе, и полека да ја намалува разликата, па брзо израмни, на 4-4. Продолживме да имаме водство од 1-2 гола, но Алкалоид пак се врати во игра, и во 17 минута повторно израмни, 9-9.

Потоа следуваа три гола, еден на Петриќ и два на Борозан, за наше водство 12-9 и гостинскиот тренер Кирил Лазаров беше приморан да бара тајмаут. Делумно вродија со плод зошто резултатот се намали на 13-12 во 28 минута. И пак Борозан, и уште еднаш Лазаревски погодија за водство 15-12. На полувреме имвме предност од 2 гола.

Тешко одеше пробивањето на гранишата од „плус 3“ гола, но тоа се случи на самиот почеток на вториот дел. Тогаш Борозан првпат зголеми на четири гола предност, 18-14, а потоа и на 19-14 што беше дотогаш највисока предност.

Иако многу рано во второто полувреме ја имавме таа предност, успеавме да не дозволиме нејзино брзо топење. Константно имавме предност од најмалку три гола, а само што влеговме во последните десет минути дојдоа и највисоките „плус 6“ гола за 27-21, а потоа и 28-22.

Од вкупно девет пенали колку што Алкалоид изведуваше, пет завршија во телата на Еспиња или Гогов. Мигуел Еспиња бранеше во одлична форма. Гогов одбрани и еден пенал.

На крајот разликата стигна до максималните осум гола предност, 34-26.

Вардар: Борозан 9, Горига 7, Лазаревски 5, Георгиевски 3, Танкоски 3, Срдановиќ 3, Ашраф 2, Николиќ 1, Петриќ 1.

📷 Вардар – Алкалоид плејоф